பயமின்றி உலகைப் பார்க்கப் பழகியவர்

கலாச்சாரம், ஆன்மிகம் என பல நற்பண்புகளுக்கு பெயர் போன தமிழக மாவட்டத்தில் அக்டோபர் மாதம் 15 ஆம் தேதி 1931இல் இச்சிறுவன் பிறந்தான்.

அவுல் பக்கீர் என பெயரிடப்பட்ட இச்சிறுவனின் தந்தை ஜைனுலாபுதீன், தன்னிடம் இருந்த சில படகுகளை அங்கிருந்த மீனவர்களுக்கு வாடகைக்கு கொடுத்து வந்தார்.
முறையாக கல்வி கற்கவில்லையே அன்றி அடர்ந்த ஞானமும், அறிவும் பெற்றவர் ஜைனுலாபுதீன். அவர் மகனை பள்ளிவாசல் தொழுகைக்கு அழைத்துச் செல்லும் போதெல்லாம் அச்சிறுவன் தந்தையின் உண்மையான பக்தி கண்டு சிலிர்த்ததும் உண்டு.
அந்த தந்தை மகனுக்கு கற்றுக் கொடுத்த முதல் பாடம், “பயமின்றி உலகைப் பார்க்கப் பழகு” என்பதுதான். அச்சிறுவனுடன் பிறந்தவர்கள் 7 பேர். அதிகாலை 4 மணிக்கு துவங்கும் அவன் நாட்கள் தினமும் இரவு 11 மணிக்குத்தான் நிறைவு பெறும்.
தினமும் அதிகாலை 4 மணிக்கு எழும் அவுல் பக்கீர் முதலில் செல்லும் இடம் கணக்கு டியூஷன். மொத்தம் ஐந்தே பேர் படித்த டியூஷன் அது. டியூஷன் முடிந்ததும் அந்நகரில் இருக்கும் வீடுகளுக்கு எல்லாம் பேப்பர் போடும் வேளை அவுல் பக்கீருக்கு.
மின்சாரம் இல்லாத அந்நகரில் தினமும் இரவு 7 மணி முதல் 9 மணி வரை மண்ணெண்ணெய் விளக்கு கொளுத்தியிருப்பார்கள். அவுல் தினமும் இரவு 11 மணிவரை படிப்பார் என்பதினா லேயே அவர் தாய் மண்ணெண்ணெயை சிக்கனமாக செலவு செய்து மகன் படிப்பதற்காக சேமித்து வைப்பாராம்.
பள்ளியின் சிறந்த மாணவனாக தேர்வு பெற்ற அவுல் பக்கீருக்கு அவருடைய உயர்நிலைப்பள்ளி ஆசிரியர் ஐயாதுரை கற்றுக் கொடுத்த முதல் வெற்றி வாசகம், “நீ உண்மையோடும் தீவிரத்தோடும் எதில் ஆசை வைத்தாலும் அது உனக்கு நிச்சயம் கிடைத்தே தீரும்”. இந்த மந்திரம்தான் அவுல் பக்கீர் உலகை பயமின்றிப் பார்க்க ஊன்றுகோலாய் பின்னாளில் அமைந்தது.
ஏழ்மையின் தடைகள் கண்டு அசராத அவுல் பக்கீரை அதிசயத்திலும் ஆச்சரியத்திலும் ஆழ்த்திய ஒரே விஷயம், “பறக்கும் பறவைகள்” தான். பறவைகளின் இந்தச் செயல் அவருக்குள் எண்ணற்ற கற்பனைகளையும், விமானத்தை தான் இயக்க வேண்டும் என்ற கனவுகளையும் வார்த்தெடுத்தது.
ஆனால் பள்ளிக் கல்வியை முடித்ததும் கல்லூரியில் அவரால் படிக்க முடிந்தது என்னவோ இயற்பியல். இது அவருக்கு மன நிறைவை தராத போதும், கல்லூரி நாட்களில் அவருக்கு அறிமுகமான ஆங்கில இலக்கியமும், லியோ டால்ஸ்டாய், தாமஸ் ஹார்டி போன்ற ஆங்கிலக் கவிஞர்களின் புலமையும் அவர் நம்பிக்கைக்கு உந்துதலாய் அமைந்தன.
அவுல் பக்கீருக்கு, தான் விரும்பியதை படிக்க வேண்டும் என்ற தாகம் மட்டும் தணியவே இல்லை. தனக்கிருந்த அசராத நம்பிக்கையாலும் திறமையாலும் மெட்ராஸ் இன்ஸ்டிடியூட் ஆப் டெக்னாலஜியில் (விமிஜி) ஏரானோடிக்ஸ் (கிமீக்ஷீஷீஸீணீutவீநீs) படிப்பிற்கு தேர்ந்தெடுக்கப்பட்டோர் பட்டியலில் இவர் பெயரும் இடம் பெற்றிருந்தது.
ஆனால் விமிஜி போன்ற கல்வி நிலையங்களில் படிப்பது அத்தனை எளிதான காரியமல்ல. அன்று அந்தக் கல்லூரியில் சேர 1000 ரூபாய் பதிவுத் தொகையாக கட்ட வேண்டியிருந்த நிலையில், தளர்ந்து போன அவுல் பக்கீருக்கு எதிர்காலம் குறித்து கனவுகள் கேள்விக்குறியாகத் தொடங்கின. ஆனால் அவருடைய திறமையின் மேல் கொண்ட நம்பிக்கையாலும், தைரியத்தாலும் பக்கீரின் சகோதரி தன் நகைகளை எல்லாம் அடகு வைத்து பக்கீரின் கல்விக்கு உதவினார்.
சிறு வயதில் பறக்கும் பறவையை பார்த்த பொழுது அவருக்குள் எழுந்த கேள்வி, ஆச்சரியம், வியப்பு எதையோ சாதிக்கப்போகும் கனவு என அனைத்தும் நிறைவேறத் துவங்கியது அப்போதுதான்.
பக்கீரின் அறிவுத் தேடலுக்கு சரியான இடமாக அமைந்த விமிஜியில் பல விமானங்களுக்கு நடுவே நிற்கிறோம் என்பதை உணர்ந்தபோது மிகவும் உற்சாகமடைந்தார். பக்கீர், தன் முதல் விமானத்தை இயக்கியதும் அங்குதான். அத்தோடு நேரத்தின் அருமையை அவர் கற்று கொண்ட இடமும் இதுவே…
ஒருமுறை அக்கல்லூரியில் சிஸ்டம் ஒன்றை வடிவமைக்கும் வேலையை செய்து வந்த பக்கீரை காண அங்கு வந்த கல்லூரி முதல்வர், இன்னும் வேலை முழுமையடை யாததைக் கண்டு இன்னும் இரண்டு நாட்களுக்குள் முடிக்காவிட்டால் அக்கல்லூரியில் அவர் படிப்பதற்காக வழங்கப்பட்ட உதவித் தொகை திரும்பப் பெறக்கூடும் என்று சொல்லிச் சென்றார். பல வருடக் கனவு இன்னும் சில மணி நேரத்தில் முடிந்துவிடுமோ என்ற பதற்றம் வந்த போதும் சாதிக்க முடியும் என்ற தீவிரத்தில் உணவு, உறக்கம் என அனைத்தையும் துறந்து பணியாற்றினார் பக்கீர்.
குறித்த நாளில் அந்த முதல்வர் வந்து பார்வையிட்டபோது பக்கீரின் வடிவமைப்பில் அசந்து போன அவர், “உன்னை மிகுந்த அழுத்தத்திற்குள்ளாக்கியும் உன்னால் குறித்த நேரத்தில் முடிக்க முடிந்து உள்ளதே..” என்று வியந்து பாராட்டினார்.
பக்கீர் இது போல பல வேலைகளுக்கு தலைமை தாங்கி அதை வெற்றிகரமாக செய்து முடிப்பதைக் கண்டு அவருடைய ஆலோசகர், மேஜர் ஜெனரல் திரு. சுவாமிநாதன் அவர்கள் பக்கீரின் தலைமைப்பண்புக்கான வெற்றி ரகசியம், “ஒரு வேலையை எடுத்துக் கொண்ட பின் அவரால் தலைவராகவும், அடிமட்ட தொழிலாளியாகவும் இருக்க முடிகின்ற இந்த தனித்தன்மைதான்” என்றார்.
பக்கீர் எடுத்துக்கொண்ட வேலைகளில் எல்லாம் மிக முக்கியமாக கருதப்பட்டது எஸ்.எல்.வி ஏவுகணையை விண்ணில் செலுத்தியதுதான். அந்த முயற்சி தோல்வி அடைந்த அதே வேளையில் அவருடைய சிறு வயது ஆசான் ஜலாலுதீன் மரணமடைந்தார். அடி மேல் அடி விழுந்த போதும் பக்கீர் சொன்ன வரிகள், “எனக்குத் தெரியும். இந்த வேலை வெற்றியில்தான் முடியும்….
இது கடுமையான உழைப்பினாலும், முயற்சியினாலும் செய்யப் பட்டது” அவர் நம்பிக்கை வெகு விரைவில் பிரம்மாண்ட வெற்றியாக உருமாறியது. எஸ்.எல்.வி -3 ஏவுகணை வெற்றிகரமாக விண்ணில் செலுத்தப்பட்டது. தத்துவம், மதம், இலக்கியம், தடைகளிலிருந்து கற்ற பாடங்கள், அவ்வப்போது உதவிய உறவுகள் என அனைத்தும் அவர் விடாமுயற்சிக்கு வலு சேர்த்தன.
அன்று, தமிழகத்தின் கடலோரத்தில் தினசரி நாளிதழை வீடுகள்தோறும் போட்டு வந்தவர்……. இன்று, இவர் பெயரைத்தான் அனைத்து நாளிதழ்களும் தலைப்பு செய்திகளாக போடுகின்றன.
அன்று, படிப்பதற்கே மின்சாரமின்றி இருளில் துவங்கிய இவர் வாழ்க்கை…… இன்று, பாரத ரத்னா, பத்ம பூஷண் என இன்னும் ஏராளமான விருதுகளால் பிரகாசிக்கிறது.
அன்று, பறவையின் பறக்கும் சிறகை கண்டு அதிசயித்தவர்…….. இன்று, பிருத்திவி, அக்னி, ஆகாஷ், திரிசூல் என இவரால் விண்ணில், வெற்றிகரமாக செலுத்தப்பட்ட ஏவுகணைகளைக் கண்டு உலகே வியக்கிறது.
மனம் சோர்ந்து போக வேண்டிய வேளையில் துடிப்புடனும், வாய்ப்புகளே இல்லாத இடத்தில்கூட வானளவு கனவு களுடனும் எந்த அச்சமுமின்றி உலகை எதிர் கொண்டு இன்று அசாத்தியமான வெற்றிகளைக் குவித்த இந்த வெற்றியாளர் யார்…………..?
அவர்தான் அவுர் பக்கீர் ஜைனுலாப்தீன்
அப்துல்கலாம் முன்னால் ஜனாதிபதி

ஐம்பது வயதைக் கடந்த வெற்றியாளர்

கல்லூரி வாழ்க்கையை முடித்த பின்னர் தந்தை தந்த ரூ. 5000/- முதலீட்டில் ஒரு வணிக வாழ்க்கையைத் தொடங்கி, இன்றைக்கு கோபிச்செட்டிபாளையத்தில் ஒரு பெரிய வணிக சாம்ராஜ்யத்தின் முடி சூடா மன்னராகவும்,  வாசு யார்ன் மில்ஸ் இந்திய பிரைவேட் லிமிடெட், வாசு பிரிக் இண்டஸ்ட்ரீஸ், வாசு பேலஸ், வாசு பவுல்ட்ரி பார்ம்ஸ், வாசு லே அவுட், வி.பி. ராயல் ரெஸ்டாரெண்ட் என்கிற நிறுவனங்களின் நிர்வாக இயக்குனராகவும் திகழ்கின்றவர் திரு. கே.எஸ். வாசுதேவன்.
ஊட்டி அரசுக் கலைக் கல்லூரியில் பி.எஸ்.சி. சுவாலஜி பட்டப்படிப்பை படிக்கச் சென்ற பொழுது இளமைக்கே உரிய குறும்புத்தனமும், துடுக்குத்தனமும் இளங்கன்று பயமறியாது என்பதற்கேற்ப முதல் இரண்டாண்டுகள் மனம்போனபடி கல்லூரி வாழ்க்கை வாழ்ந்ததால் பல பேப்பர்களின் அரியர்ஸ், மூன்றாமாண்டு படிக்கும் போது இந்த ஆண்டோடு கல்லூரி வாழ்க்கை முடியப் போகிறது. தோல்வி முகத்தோடு எப்படி தந்தையையும், மற்ற உறவினர்களையும் நண்பர்களையும் பார்ப்பது அது நமக்கு அவமானமல்லவா என்கிற உந்துதலினால் தன்னுடைய எல்லா குறும்புகளையும் மூட்டை கட்டி வைத்து விட்டு முனைப்பாய் வைராக்கியத்தோடு அனைத்து தேர்வுகளிலும் வெற்றி பெற்று வெளியேறியவர் தான் திரு. வாசுதேவன்.
இந்த மன உறுதிக்கு உறுதுணையாய் இருந்தது அவரது பள்ளி வாழ்க்கையில் நடந்த ஒரு நிகழ்ச்சி. பத்தாம் வகுப்பு படித்துக் கொண்டிருந்த போது தன்னுடைய குறும்புத்தனத்தாலும் துடுக்காலும் விளைவுகளை எண்ணிப் பாராமல் ஒரு ஏப்ரல் முதல்நாள் முட்டாள்கள் தினத்தை கொண்டாடும் விதமாக வகுப்பாசிரியர் அமரும் நாற்காலியில் எழுதும் பேனா மையைக் கொட்டி ஆசிரியரின் வேட்டியில் கறையை உண்டு பண்ணியதால் ஆசிரியருக்கு அவர்மேல் அளவற்ற கோபம். இதனால் பத்தாம் வகுப்பில் தோல்வியடைய நேரிட்டது.
ஒன்பதாம் வகுப்பில் இருந்த சிறிய மாணவர்களுக்கு இணையாய் இரண்டாம் ஆண்டும் வகுப்பில உட்காரவே பிடிக்கவில்லை. கடந்த ஆண்டு பின்னால் இருந்தவர்களோடு இந்த ஆண்டு கூட அமர்ந்து அவர்களும் இவரை வாடா போடா என்று சஜகமாக அழைப்பதும் தன்னோடு பத்தாம் வகுப்பில் படித்தவர்கள் பதினொன்றாம் வகுப்பு சென்று விட்டதையும் தினமும் பள்ளியில் படிக்கிறபோது மனதிலே உளைச்சல், ஒவ்வொரு நாளும் உள்ளம் உரமேறியது. வாழ்க்கையில் தோல்வி என்ற துரதிர்ஷ்டம் ஒரு போதும் உண்டாகக்கூடாது என்கிற தீர்மானம் தான் பத்தாம் வகுப்பு தோல்வி தான் அவருள் ஒரு பெரிய மனமாற்றத்தை வாழ்க்கையின் மாற்றத்திற்கு அடிகோலியிருக்கிறது.
அவர் தன்னுடைய அறையின் தன் இருக்கைக்குப் பின்னால் ஒரு வாசகத்தைப் பொரித்து வைத்திருக்கிறார்.
அது Ther are only Two things in business. Results and Reasons.
                                                                       Reasons don’t count.
உண்மைதானே வணிகத்தின் வெற்றிக்கும் தோல்விக்கும் காரணங்களும் விளைவுகளும் தான் முக்கியம். ஆனால் விளைவுகள் மட்டுமே நம்மை வெளி உலகத்திற்கு வெளிச்சம் போட்டுக் காட்டும். வணிக வெற்றிக்கு நாம் எடுக்கும் தீர்மானங்களின் விளைவுகளே முக்கியம். காரணங்களல்ல. எல்லோரும் இதயத்தில் நிறுத்த வேண்டிய செய்தியல்லவா.
வாழ்க்கையில் வணிகத்தில் வெற்றிபெற பொய் சொல்லக்கூடாது. ஆரியக் கூத்தாடினாலும், காரியத்தில் கண்ணாயிருப்பது, பிறன் பொருள் விழையாமை, கோபத்தைக் கொள்ளாமல் அன்பினால் மற்றவர்களின் இதயத்தில் இடம்பிடிப்பது, வணிகத்தில் தொடர்ந்து ஏதாவது புதுமைகள் (Innovative) செய்வது, கடன் வாங்காமல் இருக்க முயற்சி செய்வது அல்லது கடன் வாங்கினால் நாணயமாக காலத்தில் திருப்பிச் செலுத்துவது, எண்ணித் துணிவது, துணிந்தபின் எண்ணுவம் என்பது இல்லாமல் இருப்பது, திட்டமிடுவது, கடுமையாக உழைப்பது, எதுவுமே இங்கே சும்மா இல்லை. எல்லாவற்றுக்கும் ஒரு விலை கண்டிப்பாக கொடுத்தே ஆக வேண்டும். என்பதும் மற்றவர்களுக்கு எந்தக் காரணத்தைக் கொண்டும் தீங்கு செய்ய முனையாமை, தன்னுடைய பணியாளர்களைத் தன்னுடைய சொத்தாக நினைக்கும் மனப்பாங்கு, அவ்வப்பொழுது தன் ஊழியர்களுக்கு சிறப்பான செயல்பாடுகளுக்காக பயிற்சியளிக்கப் பேசி அவர்களுக்கு தன்முனைப்பை ஊட்டுதல் போன்றவையே. திரு. வாசுதேவன் அவர்களின் வணிக வளர்ச்சிக்கும் வெற்றிக்கும் காரணங்கள் என்பதை கண்கூடாக பார்த்து அறிந்து கொள்ள முடிந்தது.
ஒரு மனிதரின் வெற்றிக்கு அவர் நான்கு I களை முக்கியமாக குறிப்பிடுகிறார். ஒன்று I என்கிறதுதான் தொழில் துவங்குகிற அந்த மனிதர் – மனிதரின் குணநலன்கள், பழக்க வழக்கங்கள், நண்பர்கள் மனோபாவம் என்பன.
இரண்டாவது I என்பது Imagination தொழிலைச் செய்கிறவரின் கற்பனைத்திறன் அல்லது ஆற்றல் புதுமையாய் செய்தல், எண்ணியதை அடைந்து விட்டதாகவும் அனுபவிப்பதாகவும், இப்படிச் செய்தால் என்ன எதிர்கால விளைவுகள் என்பதையும் கற்பனை காட்சிகளாகப் பார்த்து தீர்மானம் செய்யும் திறமை.
மூன்றாவது I என்பது Involvement என்கிற முழுவதுமாகத் தன்னை ஈடுபடுத்திக் கொள்கிற, கரைந்து போகிற, அர்பணித்துக் கொள்கிற தன்மை. எது நேர்ந்தாலும் விட்டு விலகாத மன உறுதி.
நான்காவது I என்பது Implement என்கிற செயலபடுத்தும் தன்மை. திட்டமிட்டதை செயல்படுத்தினால் தான் வெற்றி. செயல் இல்லாமல் விளைவு இல்லை என்கிற உண்மையை உணர்ந்து செயல்படுதல்.
I, Image, Involve and Implement என்பது தான் என்னுடைய நம்பிக்கை, இப்படி இருந்தால் வெற்றி நிச்சயம் என்பவர் திரு. வாசுதேவன்.
தன்னுடைய தந்தையைப்பற்றி நினைவு கூறும்பொழுது அவருடைய மன உறுதியையும் மனிதாபிமானத்துடன் அதேசமயம் கண்டிப்பாகவும் இருக்கும் குணத்தை பாராட்டுவதாகச் சொல்கிறார்.
1957-ம் ஆண்டு கல்லூரி பட்டப்படிப்பை முடித்த உடனேயே 1976ம் ஆண்டில் தன்னுடைய 20ம் வயதில் தந்தையாரின் கட்டளைப்படி திருமணத்தை செய்து கொண்டார் வாசுதேவன். தன் தந்தை யாரோடு எப்போதும் நட்பு முறையில் பேசுவதும் பழகுவதும் வழக்கம். தன் தந்தையாரைப் பார்த்து ஐயா எனக்கு ஏன் இவ்வளவு சிறிய வயதில் திருமணத்தை முடித்து விட்டீர்கள் சற்றுப் பொறுத்து செய்திருக்கலாமே என்றதற்கு அவர் சொன்ன ஒரே பதில் பொதி சுமக்கிறமாடு துள்ளாது என்று உனக்குத் தெரியாதா? என்று சொன்னாராம். ஆமாம் கால்கட்டு என்று திருமணத்தை வேடிக்கையாக அழைப்பதும் கூட ஒரு ஆண்மகனுக்கு கட்டுப்பாட்டையும், பொறுப்புணர்ச்சியையும் உண்டு பண்ணுவதற்கு இதைவிட சிறந்த வழி இல்லை போலும்.
1975ல் கல்லூரி பட்டப்படிப்பை முடித்த உடன் தொழில் அல்லது ஏதாவது செய்ய வேண்டுமென்று தந்தையிடம் கேட்டபோது ரூ. 5000/- த்தை முதலீடாக ஒரு வாடகை சைக்கிள் நிலையத்தை கோபி கச்சேரி மேட்டில் தொடங்குவதற்காக தந்துவிட்டு தந்தை சொன்னாராம்.
“இதோபார் உன்னுடைய இரண்டாவது அண்ணனுக்கு 2000 ரூபாய் தந்தேன். முதல் அண்ணனுக்கு 800 ரூபாய் தந்தேன். உனக்கு 5000 ரூயாய் தந்திருக்கிறேன். இதை வைத்து நீ நன்றாக வளர்ச்சியடைய வேண்டும். பணம் வேண்டும் என்று என்னிடமும் நீ வரக்கூடாது. எனக்கு உதவி வேண்டும் என்று உன்னிடமும் நான் வரமாட்டேன். திறமையாகப் பிழைத்துக் கொள் என்று சொன்னாராம்.
ஒன்று பத்தாவதும் பத்து நூறாவதும் தானே வணிகத்தின் வளர்ச்சி; அதுதானே திறமை. நல்ல நண்பர்களைத் தேர்ந்தெடுத்து யாரையும் ஏமாற்றாமல் எல்லோருக்கும் உதவி செய்து வணிகம் செய்கிறபோது வளர்ச்சிதானே உண்டாகும்.
முன்னேற்றச் சிந்தனைகளை மூளையில் விதைத்து முனைப்போடு உழைத்துக் கொண்டேயிருந்தால் மற்றவர்களுக்குத் தீங்கு செய்ய நேரம் எங்கே இருக்கிறது.
“தீதும் நன்றும் பிறர்தர வாரா” என்கிற புறநானூற்றுச் சிந்தனையை சிந்தனையில் பதித்து வைத்திருப்பவர்தான் வாசுதேவன்.
கடமையில் கண்ணும் கருத்துமாக இருந்து கடனை முறையாக திருப்பிச் செலுத்தி வளர்ச்சியடைய வேண்டும் என்கிற வாசுதேவன் 1984ல் பிரிக் இண்டஸ்ட்ரீஸ் தொடங்கி சேம்பர் செங்கற்களை முதன் முதலாக கோபிச் செட்டிபாளையம் பகுதியில் தொடங்கியபோது வங்கியில் வாங்கிய கடனைமுறையாக கட்டி நல்ல பெயரை வாங்கியதால் தான் பின்னர் ஊத்துக்குளி பேங்க் ஆப் பரோடாவில் மூன்று இலட்சங்களுக்கும் மேல் கடன் வாங்கி பவுல்ட்ரி பார்மை தன் மைத்துனரோடு தொடங்கியிருக்கிறார்.
முப்பதாயிரம் கோழிகளை வைத்து முட்டைக்கோழிப் பண்ணை வெற்றிகரமாக ஊத்துக்குளி பகுதியில் நடைபெற்றதாலும் சுமார் 54,000 கோழிகளைக் கொண்ட கோழிப்பண்ணையும் கோபிச் செட்டி பாளையத்தில் நடத்தி வருகிறார்.
கல்லூரியை விட்டு வெளியேறியவுடன் வாடகை சைக்கிள் கடையை தொடங்கினாலும் வாழ்க்கையில் வெற்றி பெற வேண்டும்! வளர்ச்சியடைய வேண்டும் என்கிற எண்ணத்தினால் நியூ இண்டிய அஸ்சூரன்ஸ் நிறுவனத்தில் இன்சூரனசு ஏஜென்ட்டாக கடுமையாக உழைத்து 1977ல் ஒரு டெவலபமெண்ட் ஆபிசராக உயர்வு அடைய முடிந்தது. 1986-ல் அதே நிறுவனத்தில் கிளை மேலாளராகப் பதவி உயர்வு பெற்று தாராபுரம், ஈரோடு முதிலிய நகரங்களில் விருப்ப ஓய்வு பெற்று வணிகத்தில் தம்மை முழுவதுமாக ஈடுபடுத்திக் கொண்டார்.
எந்தக் காரணத்திற்காகவும் பொய் சொல்லக்கூடாது. மெய் போன்ற பொய் தோற்றத்தைக் கூட உண்டு பண்ணி மற்றவர்களை மயக்கத்திற்குள்ளாக்க எப்போதும் திரு. வாசுதேவன் முயன்றதே இல்லை. 1987ல் தன் மைத்துனருக்காக கிளை மேலாளராக பணிபுரிந்து கொண்டு இருந்த பொழுது டெவலப் மெண்ட் ஆபிசர் பணிக்காக மைத்துனர் விண்ணப்பித்த போதும் கூட தன் உறவினர் என்பதை குறிப்பிடச் சொல்லி வற்புறுத்தி விண்ணப்பிக்கச் செய்தவர். அந்த காரணத்துக்காகவே அவருக்கு வேலை கிடைக்கவில்லை என்ற பொழுது அதற்கு பரிகாரமாக கோழிப்பண்ணையை முதன் முதலாக தொடங்கிய பொழுது பங்குதாரராக சேர்த்து அவருக்கு தொழில் தொடங்க வாழ்க்கை வளம்பெற வகை செய்திருக்கிறார்.
1986ல் தாராபுரம் நகரில் ஒரு விடுதியில் அறை எடுத்து தங்கியிருந்த பொழுது அந்த விடுதி சரியாக பராமரிக்கப்படாமல் வாடிக்கையாளர்களுக்கு சரியான சேவை தரப்படாமல் இருப்பதைப் பார்த்து அந்த விடுதி உரிரையாளரை சந்தித்து அந்த விடுதியின் மேம்பாட்டிற்காக ஆலோசனைகள் தந்து அது வளர்வதற்கு உதவியாயிருந்தார்.
இதனால் அந்த விடுதி உரிமையாளரும் அவரும் நண்பர்களாக மாறினர். இந்த அனுபவம் தன்னுடைய வாழ்க்கையினலும் ஒரு தலை சிறந்த விடுதியை அமைக்க வேண்டும் என்ற எண்ணத்தை உண்டு பண்ணியது. கோபிச் செட்டிபாளையத்தில் வாசு பேலஸ் என்கிற ஒரு அழகான விடுதியை நடத்தி வருகிறார்.
வாடிக்கையாளர்களின் ஆலோசனைகளை கேட்டு மாற்றங்களை உருவாக்கி மிகச் சிறப்பாக நடத்தி வருகிறார். ஒரு முறை வந்த தங்கியவர்கள் மறுமுறை வேறிடம் செல்லாமல் தக்க வைத்துக் கொள்கிற சேவை வசதிகள் இவரது தனித்தன்மை வணிக வெற்றிக்கு காரணங்கள்.
தந்தை தனது மரணத்திற்குப் பின்னர் கணிசமான சொத்தை விட்டுச் சென்றாலும் மரணத்திற்குப் பின்னரே அந்தச் சொத்துக்களின் உரிமை இவர்களுக்கு கிடைத்து. வணிக வளர்ச்சி முற்றிலும் இவரின் சொந்த முயற்சியே.
சேவை, தரம் முதலியவற்றின் மூலம் எந்தக் கால சூழலிலும் வெற்றி பெற முடியும் என்று திடமாக நம்பிக்கை கொண்டிருக்கிறார் திரு வாசுதேவன்.
தன்னுடைய பணியாளர்களை தன் சொத்தாக மதிக்கும் இவர் அரசு பணியாளர்கள் சம்பளம் பெறுவது போல் மிகச் சரியாக குறித்த தேதியில் சம்பளம் தந்துவிடுகிறார்.
உழைத்தவனுக்கு வியர்வை காயும் முன்னரே கூலியைக் கொடுத்து விடு என்பது இவரைப் பொருத்தமட்டில் வார்த்தை அல்ல வாழ்க்கை.
தன்னுடைய ஒரு மகள் மருத்துவராக அமெரிக்காவிலும் ஒரு மகள் கோபிக்கு அருகிலும் மனையோடும் மருமகளோடும் பெயரன் பெயர்த்திகளோடும் மகிழ்ச்சியான வாழ்க்கை வாழும் கே.எஸ். வாசுதேவன்.
 ஐம்பது வயதைக் கடந்திருந்தும் ஒரு இளைஞனைப் போல சுறுசுறுப்பாக அப்போதைக்கப்போதே முடிவு எடுத்து வெற்றியாளராகத் திகழும் அவரை வாழ்த்துவோம்! விடாமுயற்சியினை மேற்கொண்டு வெற்றியாளர்களாகத் திகழ்வோம்!

டாக்டர் ஆனார் கூலித் தொழிலாளி: கதையல்ல… நிஜம்

06 Jun 2011 1 Comment

by inspiremindsin Uncategorized

கூலித் தொழிலாளியாக இருந்த ஆவடியை சேர்ந்த தேவேந்திரன், இன்று டாக்டராகி, திறமைக்கு வறுமை தடையில்லை என்பதற்கு, வாழும் உதாரணமாக திகழ்கிறார்.

சென்னை ஆவடி, காமராஜர் நகரை சேர்ந்த சிவசங்கர் பார்க் டவுனில், ஒரு பாத்திரக் கடையில் கூலித் தொழிலாளியாக வேலை பார்க்கிறார். இவரின் மூத்த மகன் தேவேந்திரன். விடுமுறை காலத்தில் கூலித் தொழிலாளியாக இருந்து, தன் கடும் உழைப்பால் இன்று டாக்டராகி இருக்கிறார். சினிமாவில் ஒரு பாடல் முடிவதற்குள் கோடீஸ்வரனாகும் காட்சிகள் வரும். ஆனால், தேவேந்திரனின் கதை நீண்ட கால கடும் உழைப்பில் உருவான ஒன்று. அது சினிமாவுக்கு பொருந்தாத கதை. “எங்க வீட்டு சூழ்நிலை எனக்கு நல்லா தெரியும். அப்பா கொண்டு வரும் பணத்துல, குடும்பத்தை நடத்துறதே ரொம்ப கஷ்டம். இதுல நான் என்னோட படிப்புக்காக அப்பாவ தொல்லைப்படுத்த விரும்பல. பத்தாவது வரைக்கும் வீட்டுல படிக்க வச்சாங்க. அதுக்கு மேல படிக்க வைக்க முடியாதுன்னு வீட்டுல சொல்லிட்டாங்க. அதனால பத்தாம் வகுப்பு பொது தேர்வு முடிந்த உடனே, நான் அப்பா கூட வேலைக்கு போக ஆரம்பிச்சுட்டேன்’ என்றார் தேவேந்திரன்.

வேலைக்கு போக ஆரம்பித்தாலும், அவருடைய படிப்பு ஆர்வம் குறையவில்லை, “அதுல வருகிற வருமானத்தை வச்சு பிளஸ் 1 வகுப்பு படிக்கலாம்னு நெனச்சிருந்தேன். ரிசல்ட்டு வந்துச்சு, நான் பள்ளிக்கூடத்தில் முதல் மார்க் வாங்கிருந்தேன். அதனால பிளஸ் 1, பிளஸ் 2 வகுப்பு கல்விச் செலவை அந்த பள்ளிக்கூடமே ஏத்துக்குச்சு. ஒரு வழியா என் படிப்பால, எங்க குடும்பத்துக்கு எந்த ஒரு சிரமமும் இல்லாத மாதிரி ஆகிருச்சு. அதனால ஓரளவுக்கு என்னோட தம்பியை நிம்மதியா படிக்க வச்சாங்க’ என்று சொல்கிறார். “நான் பிளஸ் 2 தேர்வில், 1,160 மார்க் வாங்கி, ஸ்கூல்ல முதலிடம் வந்தேன். அதுக்கு பிறகு தான் எனக்கு பிரச்னைகளே ஆரம்பிச்சது’ என, தன் சாதனை பயணத்திற்கு, “பிரேக்’ போட்டார் தேவேந்திரன். பள்ளியில் முதல் மதிப்பெண் வாங்கிய தேவேந்திரனுக்கு, மேற்படிப்பு விண்ணப்பத்திற்குக் கூட, அவர் படித்த பள்ளியின் தலைமை ஆசிரியர் தான் உதவி இருக்கிறார்.

நுழைவுத்தேர்வு இருந்த அந்த காலக்கட்டத்தில், 300 மதிப்பெண்ணுக்கு 297.75 மதிப்பெண்கள் பெற்று, மருத்துவப் படிப்பு படிப்பதற்கு தேர்ச்சி பெற்றிருக்கிறார். ஆனால், கல்லூரி நுழைவுக்கட்டணம் கட்டுவதற்கு கூட, பணமின்றி பல்வேறு தன்னார்வ தொண்டு நிறுவனங்களிடமும், தனி மனிதர்களிடமும், உதவி கேட்டு கிடைக்காததால், எம்.ஜி.ஆர்., அறக்கட்டளையில் கல்விச் செலவிற்காக விண்ணப்பித்திருக்கிறார். செய்தித்தாள்களின் வழியாக, தேவேந்திரனின் நிலைமை அறிந்த எம்.ஜி.ஆர்., அறக்கட்டளை அவருடைய கல்விச் செலவு முழுமையும் ஏற்றுக் கொண்டது. தேவேந்திரனின் கஷ்டத்தை உணர்ந்த பல பேர், அவருக்கு உதவி செய்ய முன் வந்தனர். அந்த உதவிகளை எல்லாம் தன்னை போல, படிப்பிற்காக கஷ்டப்படும் சக நண்பர்களுக்கு பரிந்துரை செய்திருக்கிறார். ஐந்து ஆண்டுகள் கழித்து இன்று, தேவேந்திரன் எம்.பி.பி.எஸ்., மருத்துவ படிப்பில் முதுகலை படிப்பதற்கு, நுழைவுத்தேர்வு எழுத சத்திஸ்கர் சென்று வந்திருக்கிறார். “மேற்படிப்பு படிப்பதற்கு நிறைய செலவாகுமே, எப்படி சமாளிக்க போறீங்க’ என கேட்டால், அவரிடமிருந்து நம்பிக்கையுடன் வந்து விழுகிறது பதில், “மருத்துவ மேல்படிப்பு எல்லாத்துக்கும் அரசு ஊக்கத் தொகை கொடுக்கும். அதனால எனக்கு எந்த கவலையும் இல்ல. என் வாழ்க்கையில நான் அனுபவப்பூர்வமாக உணர்ந்து சொல்றேன். கல்வி தான் என் எல்லா முன்னேற்றத்திற்கும் காரணம். வறுமையை காரணம் காட்டி யாரும் படிப்ப பாதியில நிறுத்திடாதீங்க. உங்கக்கிட்ட இருக்கிற வறுமையை விரட்டனும்னா கல்வியால தான் அது முடியும்!’

நன்றி : அ.ப.இராசா
http://www.dinamalar.com/News_Detail.asp?Id=251067

ரசனைகளை இழந்து விடாதீர்கள்!

ரசனைகளை இழந்து விடாதீர்கள்! 
                                                                 

வாழ்க்கை நம்மை உருட்டிக் கொண்டே செல்கையில் எத்தனையோ உன்னதமான தன்மைகளை நாம் சிறிது சிறிதாக இழந்து விடுகிறோம். குழந்தைப் பருவத்திலும், இளமைப் பருவத்திலும் இருந்த எத்தனையோ ரசனைகள் சொல்லாமலேயே நம்மிடமிருந்து விடைபெற்று விடுகின்றன. ஒரு காலத்தில்
மனதைக் கொள்ளை கொண்ட இயற்கைக் காட்சிகளும், அழகான பாடல்களும் காலப் போக்கில் நம்மில் பெரும்பாலோரால் பெரிதாகக் கவனிக்கப்படுவதில்லை. ஏதோ பழைய நினைவுகளாக மட்டுமே அவை தங்கி விடுவது தான் பெரிய சோகம். அந்த ரசனைகளை இழக்கின்ற போது வாழ்க்கையின் அழகையும் சேர்ந்து நாம் இழந்து விடுகின்றோம் என்பதை நம்மில் கணிசமானோர் உணரத் தவறி விடுகிறோம்.

வில்லியம் வர்ட்ஸ்வர்த் என்ற ஆங்கில மகாகவிஞன் வானவில்லைக் குறித்து எழுதிய ஒரு பாடல் மிகவும் பிரபலமானது. பலரும் மேற்கோள் காட்டும் குழந்தையே மனிதனின் தந்தை (The Child is father of the Man) என்ற பிரபல பொன்மொழி இந்தக் கவிதையில் இருந்தே எடுக்கப்பட்டது. அந்தக் கவிதையை அனேகம் பேர் அறிந்திருக்கலாம்.

The Rainbow

My heart leaps up when I behold   A rainbow in the sky:   So was it when my life began;   So is it now I am a man;   So be it when I shall grow old, Or let me die!   The Child is father of the Man;   I could wish my days to be   Bound each to each by natural piety.

அந்தக் கவிஞன் சொல்கிறான். “வானவில்லை வானில் பார்க்கும் போதெல்லாம் என் இதயம் சிலிர்க்கிறது. அப்படித் தான் என் வாழ்க்கை ஆரம்பித்த குழந்தைப் பருவத்தில் இருந்தது. வளர்ந்த பிறகு இப்போதும் அப்படித்தான் இருக்கிறது. இதே போல் என் வயோதிக காலத்திலும் இருக்கட்டும். அப்படி இல்லா விட்டால் நான் இறந்தே போவேனாக! குழந்தையே மனிதனின் தந்தை! இயற்கையின் அழகை ரசிக்கும் பக்தனாக, என் வாழ்நாள் அனைத்திலும் இருக்கவே நான் ஆசைப்படுகிறேன்.”

வளர்ச்சி என்பது மரத்துப் போவதல்ல. நம் நுண்ணிய உணர்வுகளையும் ரசனைகளையும் தியாகம் செய்வதல்ல. எனவே வளர்ந்து விட்டதால் அவற்றை இழந்து விட்டதாய் நியாயம் கற்பித்துக் கொள்வது நம்மை நாமே ஏமாற்றிக் கொள்ளும் செயல் ஆகும். வளர வளர இழக்க வேண்டியது நம் முட்டாள்தனங்களையும், அறியாமையையும் தானே ஒழிய ரசனைகளை அல்ல.

மனோதத்துவ மேதை ஆல்ஃப்ரட் ஆட்லர் (Alfred Adler) அவர்களிடம் ஒரு பேட்டியாளர் ஒரு கேள்வி கேட்டார். “நீங்கள் மிகவும் சந்தோஷமான மனிதராக யாரை எண்ணுகிறீர்கள்?”

ஆட்லர் அவர்கள் சுற்றுலாத் தளமான ஒரு மலைமுகட்டில் வேலை பார்க்கும் பணியாளர் ஒருவரைச் சொன்னார். அந்தப் பணியாளர் தினமும் அதிகாலை அந்த மலையேறி மேலே சென்று மாலை கடைசி சுற்றுலாப் பயணியும் கீழே இறங்கிய பின் தான் கீழே வர வேண்டும். மலை முகட்டில் ஒரு சிறிய கேபினில் கெட்டில் வைத்து தேவைப்படுகிறவர்களுக்கு தேனீர் தயாரித்துத் தரும் பணி அவருடையது.

ஆட்லர் அங்கு சென்றிருந்த சமயம் பயணி ஒருவர் மிகவும் குளிர் அதிகமாக உள்ளதென்று சொல்லி அந்த கேபினிற்குள்ளே சென்று கதவை சாத்திக் கொண்டார். அந்தப் பணியாளர் அவரிடம் சொன்னார். “ஐயா இந்த மாலை நேர சூரிய கிரணங்கள் அந்த மேகங்களினூடே தெரிகிற அழகே தனி. கதவை சாத்தி விட்டால் அதை நீங்கள் கண்டு ரசிக்க முடியாமல் போய் விடும்.  நான் எப்போதும் அந்தக் காட்சியைத் தவற விடுவதே இல்லை”

ஆட்லர் அந்த பேட்டியாளரிடம் சொன்னார். “அந்த கடுங்குளிரையும் மீறி தினமும் காண்கிற அந்தக் காட்சியை தவற விடாமல் ரசிக்கும் அந்த பணியாளர் தான் மிகவும் சந்தோஷமான ஆள் என்று நினைக்கிறேன். அவர் வாங்கும் ஊதியம் குறைவாகவே இருக்கலாம், அந்த வேலை அடுத்தவர் பார்வைக்கு சுவாரசியமானதாக இல்லாமல் இருக்கலாம். ஆனால் சலிக்காமல் தினமும் ரசிக்க முடிகிற அவர் தான் உண்மையிலேயே மிகவும் சந்தோஷமான மனிதர் என்று நினைக்கிறேன்”.

தினசரி வாழ்க்கையில் காணக் கிடைக்கிற அழகுகளை ரசிக்க மறந்து விடுவது உண்மையான எந்திரத்தனம். கிட்டத்தட்ட எந்திரங்களாய் மாறி விடுகிற போக்கு தான் வளர்ச்சி என்றால் நாம் வளராமலேயே இருப்பதே சிறந்தது. ஒரு அழகான கதையை, நெஞ்சை அள்ளும் கவிதையை, இனிமையான இசையை, குழந்தையின் மழலையை, இயற்கையின் அழகை ரசிக்க நேரமும் மனமும் இல்லாமல் ஓட்டும் வாழ்க்கையில் என்ன சிறப்பு இருக்கிறது? சதா சர்வ காலம் அதையே ரசித்துக் கொண்டிருப்பது போதுமானது என்று சொல்ல வரவில்லை. செய்ய வேண்டிய வேலைகள் ஆயிரம் இருக்கையில் அனைத்திற்கும் அவற்றிற்குரிய கவனம் கொடுத்தே ஆக வேண்டும் என்பதில் இரு கருத்து இருக்க முடியாது. ரசனை நம் வயிற்றை நிரப்பி விடாது என்பதும் மறுக்க முடியாத உண்மையே. ஆனால் வயிற்றை நிரப்புவதிலும் பொருள் சேர்ப்பதிலும் மட்டுமே வாழ்க்கை நிறைவு பெற்று விடுவதில்லை.

ஒருவர் ரசனை இன்னொருவருக்கு இருப்பதில்லை. இசையை ரசிக்கும் ஒருவர் அந்த அளவுக்குக் கவிதையை ரசிக்காமல் போகலாம். வர்ட்ஸ்வர்த்தை சிலிர்க்க வைத்த வானவில் அழகு இன்னொருவருக்கு ஒரு பொருட்டே இல்லாமல் போகலாம். ஆனால் அந்த நபர் ஒரு குழந்தையின் மழலையையும், குறும்பையும் ரசிக்க முடிந்தவராக இருக்கலாம். இப்படி ஒவ்வொருவர் ரசனையும் வேறுபடலாம். ஆனால் ரசனைகளே இல்லாமல் இருப்பவர்கள் குறைவு. இருக்கும் ரசிக்கும் திறனையும் இன்றைய எந்திர வாழ்வில் சிறிது சிறிதாக இழந்து விடுவது மனிதன் தன்னில் ஒரு பகுதியை மரணிக்க வைத்து விடுவது போலத் தான். அதை அனுமதித்து விடாதீர்கள்!!

நன்றி..............http://enganeshan.blogspot.com/2011/12/blog-post_23.html

ஏழே நாட்களில் உங்கள் எடையை குறைக்க...

  உடல் எடை அதிகரிப்பால் அவதிப்படுபவர் ஏராளம். கொஞ்சம் குண்டாக வேண்டும் என்று ஆசைப்படுவோர் கூட, உடல் எடை அதிகமுள்ளவரின் அவஸ்தைகளைக் கேட்டால் கொஞ்சம் அரண்டு தான் போவார்கள்.

நிற்க கஷ்டம், நடக்க கஷ்டம் என்று அவர்களின் தொல்லைகள் நீளும். இன்னொரு புறம் தேவையில்லாத வியாதிகள் ஒன்றன்பின் ஒன்றாக தொற்றத் தொடங்கும்.

உணவுப்பழக்கத்தில் அதிக கவனம் செலுத்தாததுதான் உடல் எடை அதிகரிக்க முக்கிய காரணம். துரித உணவுகள், நொறுக்குத் தீனிகளை கண்டபடி தின்றுவிட்டு எடை கூடியபிறகு டயட் என்ற பெயரில் உணவைக் குறைத்துக் கொள்பவர்கள் ஏராளம்.

நடைபயணம், ஓட்டம், நீச்சல், விளையாட்டுகள் என்று வேறு சில முயற்சிகளில் இறங்கி எடையைக் குறைக்க ஆசைப்படுபவர்களும் உண்டு. மருந்து மாத்திரைகள், சத்துமாவுகள், பழங்களை சாப்பிட்டு சிலர் பயன் தேடுகிறார்கள்.

எத்தனையோ வழியில், எவ்வளவோ பேர் எடையைக் குறைக்க ஓடிக் கொண்டுதான் இருக்கிறார்கள். உடல் எடைப் பிரச்சினை உலகம் முழுவதும் இருக்கிறது. மேற்கத்திய நாடுகளில் குண்டு உடல்காரர்கள் மிகுதி. அவர்களின் பிரச்சினையை குறைக்க அமெரிக்காவில் ஒரு ஆய்வு நடத்தப்பட்டது. ஆய்வு முடிவில் உடல் எடையைக் குறைக்க சுலபமான வழியை அறிமுகப்படுத்தினார்கள்.

7 நாட்களுக்கு உணவுப் பழக்கத்தில் சில மாற்றங்களை ஏற்படுத்திக் கொண்டால் சுமார் 6 கிலோ வரை எடை குறையும் என்று அந்த ஆய்வு முடிவில் உறுதியளிக்கப்பட்டது.

அந்த ஆய்வின்படி முதல்நாள் முழுக்க முழுக்க பழ வர்க்கங்களை மட்டும் உண்ண வேண்டும்.

1. ஆரஞ்சு, ஆப்பிள், அன்னாசி, மாதுளை, தர்பூசணி, சப்போட்டா என்று எந்தப் பழங்களை வேண்டுமானாலும் சாப்பிடலாம். தண்ணீர் சத்து நிறைந்த தர்ப்பூசணி மிகவும் நல்லது. ஆனால் வாழைப்பழம் தவிர்க்க வேண்டும்.

2. இரண்டாம் நாள் காய்கறிகளை சேர்த்துக் கொள்ள வேண்டும். ருசிக்காக உப்பு, காரம் சேர்த்துக் கொள்ளலாம். வயிறு நிரம்ப சாப்பிடலாம். காலையில் உருளைக்கிழங்கு மட்டும் சாப்பிட வேண்டும். காய்கறிகளை வேக வைத்து சாப்பிடுபவர்கள் எண்ணெய், தேங்காய் சேர்க்கக்கூடாது.

3. மூன்றாவது நாள் பழங்கள், காய்கறிகள் கலந்து சாப்பிட வேண்டும். அன்றைய தினம் உருளைக்கிழங்கு, வாழைப்பழம் தவிர்க்க வேண்டும்.

4. நான்காவது நாள் வாழைப்பழமும், பாலும் தான் சாப்பாடு. அதிகபட்சமாக 3 டம்ளர் பாலும், 8 பழங்களும் உண்ணலாம். விரும்பினால் காய்கறி சூப் ஒரு கப் சாப்பிட்டுக் கொள்ளுங்கள்.

ஐந்தாம் நாள் சிறிதளவு(ஒரு கிண்ணம்) அரிசி சாதம் சேர்க்கலாம். மீதி பசிக்கு பெரிய தக்காளிப் பழங்கள் 6 சாப்பிட்டுக் கொள்ள வேண்டும். அதற்கு மேல் பசியெடுத்தால் தண்ணீர் தான் குடிக்க வேண்டும். வழக்கத்தைவிட கூடுதலாக 4 டம்ளர்(மொத்தம் 12 டம்ளர்) தண்ணீர் பருக ஆய்வு அறிவுறுத்துகிறது.

5. ஆறாம் நாள் சிறிது அரிசி சாதமும், மீதிக்கு காய்கறிகளும் சாப்பிடுங்கள். காய்கறிகளை வேக வைத்தோ, பச்சையாகவோ வயிறு நிரம்ப சாப்பிடலாம்.

6. ஏழாவது நாள் ஒரு கப் சாதம் - காய்கறிகளுடன், பழ ஜுஸ் பருகுங்கள். மற்ற நாட்களில் பழங்களை ஜுஸ் செய்து சாப்பிடக்கூடாது. அவ்வளவுதான் டயட் முடிந்தது.

7. 8-ம்நாள் எடை இயந்திரத்தில் ஏறிப் பாருங்கள். மாற்றம் தெரியும் என்கிறது அந்த ஆய்வு.

இந்த டயட் முறைக்கு வேறு கட்டுப்பாட்டு விதிகள் இல்லை என்பது சிறப்பானது. டீ, காபி சாப்பிடுபவர்கள் பால், சர்க்கரை தவிர்த்து பருகலாம். டீயில் எலுமிச்சை பிழிந்து சாப்பிட்டால் நல்லது தான்.

எண்ணெய் தவிர்த்து வருவது சிறந்த பலன் தரும். முடியாத பட்சத்தில் ஒரு டீஸ்பூன் எண்ணை சேர்த்துக் கொள்ளலாம். முதல் இரண்டு நாட்களில் சேர்க்கும் பழங்கள், காய்கறிகள் உடலுக்கு போதிய ஆற்றலை வழங்கும்.

3-வது நாளில் இருந்து கொழுப்பு எரிக்கும் பணி உடலில் நடைபெறுகிறது. அதை நீங்களே உணர முடியும். நான்காம் நாளில் சேர்க்கப்படும் வாழைப்பழம், உடல் இழக்கும் பொட்டாசியம், சோடியம் சத்துக்கள் கிடைக்க உதவுகிறது.

5-ம் நாள் அதிகப்படியான தண்ணீர் சேர்க்கப்படுவது உடல் உறுப்புகளை சுத்தம் செய்யும். சிறிது அரிசி சாதம் சேர்ப்பதால் 5, 6-வது நாட்களில் உடலுக்கு போதுமான சத்து கிடைக்கிறது. 7-வது நாளில் மாற்றங்களின் பலனை உடல் சுறுசுறுப்பில் இருந்து உணரலாம்.

அமெரிக்காவின் ஜான் ஹாப்கின்ஸ் ஆய்வு மையம் இந்த ஆய்வை மேற்கொண்டது. பிரசித்தி பெற்ற ஜெனரல் மோட்டார்ஸ் நிறுவனம், ஆய்வை அங்கீகரித்து தங்கள் ஊழியர்களின் எடை குறைப்பிற்காக கடைப்பிடிக்க வைத்தது.

அதற்கு நல்ல பலன் கிடைத்ததால் அது ஜெனரல் மோட்டார்ஸ் டயட் என்று அழைக்கப்படுகிறது. மேலும் எடை குறைய விரும்புபவர்கள் 3 நாள் இடைவெளிவிட்டு மீண்டும் இதே டயட் முறையை கடைபிடிக்கலாம் என்று அந்த ஆய்வில் தெரிவிக்கப்பட்டுள்ளது.